Zwolle

Ik bin vandemiddag op vesite bi’j Antje in Zwolle west. Ik kwam vroeger mit kammeraotien Wube de Vries bi’j heur vader en moeder in Blesdieke uutvanhuus. Antje is tien jaor oolder en hadde doe verkering mit Dick uut Blokziel. We hebben de jaoren deur altied kontakt hullen. Hieronder een foto van heur vader en moeder, Janne en Wander van Veen, uut de tied dawwe bi’j heur uutvanhuusden. Ik zal daor nog een verhael over schrieven veur De Ovend. Wat vuulde Blesdieke indertied as joongien van negen jaor veer van huus. Veerder vot as Moskou in laeter jaoren. We hebben vandemiddag genoeglik bi’jpraot mit een peer bakkies thee en wat lekkers. Onderweg naor huus was et al donker en et regende. Ik docht eerst da’k alles gewoon zo zag as altied. Mar doe ‘k beter keek, zag ik de koplaampen van de auto ok as steerns. De aachterlaampen niet. Ik daenke now dat dit al een hiele tied zo is, dat et hiel geleidelik kommen is, en da’k d’r gewoon gien arg in had hebbe. De lanteerns pal veur et huus bin gien steerns, die veerder vot staon wel. Hoe dichterbi’j hoe gewoner. Dit het grif alles mit staar te maeken. Veur de wissighied za’k maendagmiddag et planburo van et ziekenhuus nog even bellen. Ik kan now trouwens weer prima lezen, komputeren en tillevisiekieken.