Zwolle

Ik bin vandemiddag naor Antje in Zwolle west. As klein joongien kwam ik bi’j heur oolden in Blesdieke uutvanhuus. We kennen mekeer dus al hiel lange en ik kieke elk jaor zeker ien keer bi’j heur en we bellen zo now en dan. Ik belde heur een kleine twie weken leden omdat ze jaorig was. D’r wodde niet opneumen. Ik hebbe tien daegen beld en d’r wodde nooit opneumen. Gistermiddag heurde ‘k van kunde van heur in Wolvege dat ze in et ziekenhuus liggen zol. En doe belde heur zeune Warner om te vertellen wat d’r allegeer gebeurd was. Zodoende bin ik vandemiddag naor heur toe west in revelidaosiecentrum IJsselheem op ‘e zesde verdieping van et Isala-ziekenhuus in Zwolle. Wat is et daor allemachtige groot. Ik bin daor een goeie twintig jaor leden veur et laeste west doe et nog Sophia-ziekenhuus hiette. Et was me goed uutlegd hoe a’k lopen mos en ik bin goed te plak kommen. Et gong goed mit heur. We hebben genoeglik een goed ure praot. As et zo veerdergaot mag ze op 8 juni naor huus toe. Weeromme naor huus was et smoor-  en smoordrok op ‘e weg.

Ik hebbe vandaege de tiende en laeste oflevering van de podcast Door de ogen van de koning beluusterd. Edwin Evers praot in tien podcasts in tetaol meer as vier uren mit de keuning in verbaand mit et feit dat hi’j tien jaor keuning is. Et bin hiele eupenhattige en vlotte gesprekken over een protte dingen die d’r in die tien jaor gebeurd binnen. En dat is nogal wat. In ien van de podcasts belde Sven Kramer. Hi’j vreug as ze tegere de volgende Elfstedetocht rieden zullen. Ik daenke niet da’k dat mitmaeken zal. Niet dat ik daenke dat beide manluden dat niet kunnen zollen, mar zol d’r echt ooit nog es een Elfstedetocht kommen tiedens mien leven?