Zwolle

Gistermiddag he’k mit poes Marja naor de dieredokter in Noordwoolde west veur et jaorlikse prikkien tegen alderhaande ziekten. Et was weer een vreselike tocht mit een protte klaegelik gemiauw. Ik kreeg d’r zoas altied een schuldgevuul van. Wat doe ik dit aarme dier toch an… Hier komt grif nog wel es een kollum over. Vandemiddag he’k naor Antje in Zwolle west. Vroeger kwam ik as joongien mit een kammeraotien uutvanhuus bi’j heur oolden in Blesdieke. Antje is tien jaor oolder as ik bin. Zi’j hadde destieds verkering mit Dick uut Blokziel. Wat vien ik et mooi dawwe as oolde meensken nog altied kontakt mit mekeer hebben. Et vuult zo vertrouwd.

De luustermiddaegen in Bargen an Zee in et kader van Reis door het Nederlands wo’n groot en groots anpakt. Disse ‘reklamefoto’ is werachtig toch lange niet gek! Zie ok mien dagboekstokkien van gister.