Zwikstra

Vandemiddag he’k veur de laeste keer naor boekhaandel Zwikstra west. Et was heur laeste dag en now het Wolvege nao 125 jaor gien boekwinkel meer. Et is meer as triest… Ik was nog mar krek in de winkel en doe kwam Sunderklaos d’r in mit wel tien roetveegpieten. Sunderklaos kwam drekt op me of, hi’j kende me, en gaf me de haand. Ik hebbe him nog vraogd as hi’j d’r niet wat an doen kon om de winkel los te holen. Mar dat kon hi’j niet. Van ien van de Pieten kree’k een haandvol peperneuten. Laeter bin ‘k naost de burgemeester zitten gaon. We kregen daor ok wat drinken. En we hebben herinnerings ophaeld. Goeie herinnerings bin een protte weerd. Dat ik daor signeren moch doe Een brogge van glas uutkwam. D’r kwammen 80 meensken langes en d’r laggen 100 boeken klaor die al besteld weren en die ‘k ok signeren mos. Dat was in 2006 en dat is aenlik niet iens zolange leden. Mar in de tied van vandaege-de-dag mit et almar meer ofbrokkelende Stellingwarfs en de boekverkope, kuj’ je zoks haost niet meer veurstellen. En dan mien boek Verrassend Stellingwarfs, een boek mit vertaelde verhaelen van bekende Nederlaanse schrievers, dat uutkwam omdat Zwikstra 100 jaor beston en die mooie aovend bi’j Dragt mit Marjan Berk en domenee Nico ter Linden. En vanzels de Boekebals en dat ik me verstruupt hadde as Uulkje Dolman, de zuster van Margreet. Overal was Frits van der Vinne van boekhaandel Zwikstra bi’j betrokken. Et het goed west da’k him op 14 juli et eerste exemplaor van mien laeste boek Naozoemerlaand geven hebbe. Hi’j hadde dat meer as verdiend. Et laeste boek da’k bi’j heur kocht hebbe was vandemiddag Bestemming Reykjavik van Gerard van Klaveren, de veurganger van burgemeester André van de Nadort daor ik vandemiddag naost zat. Ik hebbe heur daor vervolgens een haand geven en et alderbeste toeweenskt. Et vuulde mal doe ‘k daor veur de laeste keer de winkel uutleup.