Zwatte Pieten

Et dee eregister blieken dat d’r in oonze omkrieten nog zat Zwatte Pieten binnen. En dan echt poerzwatte Pieten. Ik zag d’r in Wolvege minstens tiene bi’j mekeer. Now vien ik roetveegpieten een hiel goed alternatief, mar ik vun et best wel mooi om nog es een fluttien oolderwetse Pieten te zien. En gien meens maekte d’r bezwaor tegen, nargens ston volk mit protestbodden. Ik hebbe d’r trouwens ok nooit racistische gedaachten bi’j had. Et gebeurde allemaole in en om de supermark van Poiesz. In de winkel herkende ien van de Pieten mi’j. Hoe et mit me was? En dat hi’j me al zolange niet zien hadde. Dat klopt wel, die Pieten bin hier mar iene keer in ’t jaor. En ik mos veural Stellingwarfs praoten blieven! Wat een aorige Pieten! Ik kreeg twie hanen vol kruudneuten. Een vrouw die vlakbi’j me ston kreeg ok een haandvol. Mar die het ze laeter an mi’j geven. Ik mag dat spul graeg! En waj’ veur niks kriegen, hoej’ niet te kopen in disse dure tied!
Vandemiddag he’k bi’j de dokter west veur de jaorlikse huudkankerkontrole. Binnenkot moe’n d’r twie plakkies anpakt wodden. Iene moet votschrapt wodden en iene votsneden. En zo blief ik almar lekker an ’t dokteren.