Zwatte Madonna

Ik hebbe et boek Nigra sum sed formosa lezen en veural bekeken. Dat is Latien en betekent Ik bin zwat mar mooi. Et is een boek van de Belgische Malvine Marichal en de Stellingwarver Peter Hiemstra. Zi’j warkt mit textiel, hi’j is keramist. Ze hebben heur beidend inspireren laoten deur de Zwatte Madonna. Die vien ie overal op ‘e wereld. Hiele bekenden bin die van Montserrat in Spanje en Czestochowa in Polen. Frank van Splunder het een inleiding in et boek schreven: Een verhaal in textiel, keramiek en woorden. Sijtze Veldema het foto’s van de zwatte madonna’s van Malvine en Peter maekt. Et is prachtig om alles rustig te bekieken. Een mooi boek en ongetwiefeld te koop bi’j Peter Hiemstra, thuus in Berkoop.

Op 3 juni 1974 heb ik tegere mit kammeraod Haarm de Zwatte Madonna van Montserrat bekeken. We weren van 31 meie t/m 14 juni op vekaansie in Lloret de Mar. We kwammen op die dadde juni morgens om 20 over 7 van bedde en gongen om kwat over 8 vot zonder eten had te hebben en we kregen ok gien lunchpakketten mit van oons IFA-Hotel. De ekskursie naor Montserrat kostte  oons ieder 300 ptas. In Montserrat bekeken we et klooster mit de schilderi’jen van El Greco. Et lag hoge in de bargen en we mossen mit de bus een weg langes mit een protte griezelige bochten. Daor zaggen we dus ok de Zwatte Madonna mit et kientien Jiezus. Ik kocht daor een ansichtkaorte van. Die staot hieronder. Om 1 ure zong d’r een jongeskoor in de karke. We weren aovens om half 7 weeromme in et hotel. Om 10 over 8 kregen we eten: bouillon, eerpelpuree, vleis, wottelties en pudding. We dronken d’r bitter lemon bi’j. Om 20 veur 10 gongen we Lloret de Mar nog in en om half 12 op bedde. Niet echt enerverend veur twie jonge kerels van in de twintig. Mien hemel nog an toe…. En dat is ien disser daegen dus 52 jaor leden.