Zwatsluus

We bin vandaege op stap west naor Zwatsluus. Daor hewwe et Schoonewelle Museum bekeken in een gebouw an de Haandelskade daor de biebeltheek ok in zit. In et museumkefé hewwe eerst wat drinken had mit een koeke d’r bi’j. Vervolgens hewwe et mooie museum bekeken. Boven is een ofdieling over et dna van Zwatsluus. Een mooie film over de geschiedenis en ie kun daor vanzels van alles te weten kommen over de febriek van Buisman daor ze koffiestroop maekten en nog altied maeken. In 1867 wodde daor de eerste koffiestroop maekt deur Herman Buisman. Een scheppien Buisman bi’j de koffie uut dat bekende blikkien was altied hiel gebrukelik. Nao al die lange jaoren in Zwatsluus verhuust Buisman dit jaor naor Braobaant. Dat heurt toch aenlik niet zo. D’r was ok een protte andacht veur de febriek van mattekloppers die daor vroeger was. Beneden in et gebouw is een prachtige ofdieling over de netuur van de Kop van Overiessel. Een protte opzette dieren, filmpies en voegelgeluden. Nao et museum hewwe een kuier deur Zwatsluus maekt. We hebben vanaovend lekker waarm eten had bi’j Van der Valk in Wolvege. Hieronder een foto die ‘k vandemiddag vanuut et raem van et museum maekt hebbe. Et was jammer genoeg nogal donker weer. Veur et museum ligt zo te zien een mooie twiemaster an de kade.