Zwaor weer op komst

Veurdat de zunne vandemiddag in et nust kreup, he’k vandemorgen nog even op ‘e fiets de diek uut west. Et was nog altied heerlik fietsweer mit 22 graoden. Veurda’k over aanderhalve weke even op vekaansie gao wi’k dit jaor in ieder geval duzend kilemeter fietst hebben. Ik hebbe boeken haeld bi’j de biebeltheek in Wolvege en hebbe in Hooltpae overleg had betreffende de JVS. Vandaege over een weke hewwe de zoemervergeerdering van de stichting. Ik zag krek op ‘e buierader dat d’r om zes ure zwaor weer op komst is. Regen en onweer. Van kiendsof an bin ‘k al bange veur onweer. As d’r in et verleden naachs onweer kwam, zat ik mit de kleren an en een flut belangrieke pepiereboel bi’j me onderan de trappe. Vlakbi’j de veurdeure om zo votkommen te kunnen. Mar es zien hoe as et aanst komt.

Harry van De Lemmer uutvanhuust op et ogenblik in et mooie hotel Berg en Dal in et Limburgse Epen. Wat een prachtig glooiend laand is et daore. Hi’j stuurde me gister disse foto’s toe.