Zwannefemilie

Veurdat regen en lichtkaans ok hadde wiend en onweer kommen, he’k vandaege nog een lekkere fietstocht van 45 kilemeter maekt. Et was tiedens et fietsen meerst bewolkt, laeter kwam de zunne. Et was heerlik weer. Doe ‘k thuus kwam was et 25 graoden. Et is op et ogenblik om tien over zesse 29 graoden. Ik bin bi’j de Lende langes naor de Driewegsluus fietst en doe naor Ooldemark. Daor he’k op et terras van Family een twaelfuurtien en een bakkien drinken had. Ik bin doe de prachtige Oosterdallaene uutfietst naor de weg van Ooldemark naor Stienwiekerwoold en bin op een gegeven mement links ofsleugen naor Willemsoord. Eerst deur de bos en over de Paosloregel. Van Willemsoord bin ‘k naor De Eese gaon. Ik bin de Heerlikhied niet ingaon, mar over Steggerde en De Hoeve weer naor huus gaon. Vanof et Lendepattien he’k onderwegens een foto van een zwannefemilie maekt op een lappe laand in Blesdieke. De beide oolden mit drie al aorig grote jongen. En die jongen zullen krek zo mooi wit as de oolden wodden. Ze zullen laeter de wereld in moeten en heur eigen leven leven moeten. Zollen ze mekaander dan nog kennen? Mar zoveer is et nog niet. Ze bin now nog gezellig mit ’n vuven bi’j mekeer.