Zute eerpels

Kot nao mekaander bin Melle en Jikke wegraekt. Melle de Haan (1937-2024) en Jikke de Haan-Steensma (1938-2024). Minne is op 8 augustus wegraekt, Jikke op 12 augustus. Zo now en dan kruusten oonze wegen mekaander. Zoas vroeger bi’j de koffiekonserten, hier in de karke van Ni’jhooltpae. Ze kwammen wel bi’j mien optredens as ik in Franeker vertellen moch. Ze bin wel es bi’j mi’j op vesite west en ikke bi’j heur in Franeker. En we bin mit mekeer op vesite west bi’j Jan en Klasien in Ooldege. Vandaege was de kremaosieplechtighied, daor ik niet henne west hebbe. Dat wodde me votdaolik wat te drok. Ik hebbe de femilie vanzels wel een kaorte stuurd.

Ik bin vandemiddag wel naor de kapper in Et Vene west. Dat zol vleden weke al, mar kon doe niet deurgaon. Ik bin mit de auto west, aanders wa’k vanzels mit de fiets gaon. Mar d’r staot vandaege nogal wat wiend en dat komt me d’r nog te vule op an. Ik hebbe bi’j Bertha een peer koppies thee en een plakkien bolle mit geitekeze had. Butendat he’k een peer zute eerpels mitkregen. In et ziekenhuus kreeg ik, doe ‘k weer wat hebben moch, zute eerpelsoep. Heerlik! Ik wil dus perberen en maek soep van die eerpels. Mar es zien as me dat lokken gaot.

In et ziekenhuus kree’k apps en een foto van Douwe en Romkje. Die weren en bin misschien nog wel op vekaansie in Bad König in et Duutse Odenwald. Douwe appte dat Wilhelmina en Hendrik heur daor indertied verloofden. Ik hebbe et even naokeken. Dat was op 12 oktober 1900, et wodde officieel bekendmaekt op 16 oktober. Ze trouwden op 7 feberwaori 1901. Et wodde nao verloop van tied spietig genoeg gien gelokkig huwelik.