Zundagswark

Naoda’k gister op ‘e vlieg was, mos d’r vandaege vanzels wel weer wat gebeuren. Ik hebbe et grootste pat van de dag in mien warkkaemer zeten. Ze zeggen dat zundagswark niet stark is, ik hope dat et wat mitvaalt. Ik hebbe alle verhaelen rippeteerd veur et optreden van woensdagmorgen in de biebeltheek van Et Vene. Ien verhael moet morgen nog een keer, dat zit d’r nog niet goed genoeg in. Butendat he’k een kollum schreven over de dag van gister in Sunt Jacobiperochie. Ik hebbe daor een protte tied an besteded. Et was me almar niet naor de zin. Et moet eerst mar zo. Ik hebbe ok nog een haandtaast wark daon veur de JVS. Op deensdagmorgen 9 december hewwe hier oonze wintervergeerdering. En dan he’k ok nog een grote panne stamppot eerpels/zoerkool klaormaekt. Dan he’k de kommende daegen veerder gien wark van de eteri’je.