Zulver in Harlingen

Ik bin vandaege mit de trein naor Harlingen west. Ik mos overstappen in Liwwadden, dat ik hebbe daor vanzels mitien de mooi restereerde stesjonshal bekeken. In Harlingen he’k naor et Hannemahuus west. Een prachtig museum. Ik bin d’r al vaeke west. De vaaste kollektie is slim de muuite weerd, mar ik kwam vandaege in et biezunder veur de tentoonstelling Verzameld Zilver. Schitterend! Wat konnen ze vroeger mooi spul maeken. Harlingen het deur de jaoren henne 86 zulversmeden had. Wat was d’r een protte moois te bekieken: branewienkoemen, bekers, bokalen, lepels en vorken, theebussies, zooltvatties, kandelaars, theepotten, ketels. D’r was een prachtige ketel op een kefoor te zien dat maekt was deur Hendrik Fortuin in 1741 in Leiden. Van alle zulver was de maeker bekend en et jaor waor et in maekt was. D’r was ok een zulveren bri’jkoeme te zien mit een lit d’r op. Dat ze de bri’j vroeger in zoe’n mooie koeme deden! Ik hadde nog nooit van bri’jkoemen heurd, wel van branewienkoemen. Netuurlik weren d’r ok tal van zulveren huweliksdeusies (knottedeusies). De man gaf dat an de vrouw bi’j et trouwen. Et mooie was dat d’r bi’j ien van die deusies een hiel verhael te zien en te lezen was. Claes Jurjen Fontein (1616) trouwde in 1646 mit Antje Reijners Jeddema (1629) uut Liwwadden. Kiek even naor de geboortedaotums! Hi’j was dus 30 en zi’j 17. Zol et een glundige pikeur west hebben? Zollen ze vanwege et geld trouwd wezen of weren ze gewoon staepelgek op mekaander? Dat weten we allemaole niet. D’r hong van elk wel een mooi petret. En Claes haelde Antje mit de trekschute uut Liwwadden. En dan ok nog de aldereerste trekschute die van Harlingen naor Liwwadden veerde. Et was mooi weer en onderwegens stonnen drommen meensken bi’j et waeter langes om dat biezunders zien te kunnen. Antje kreeg dat mooie huwelikskissien dus van Claes en dat kun wi’j nog nog bekieken in Harlingen. Mit zoe’n verhael d’r bi’j wodt zoe’n tentoonstelling hatstikke mooi. Nao de tentoonstelling he’k een brotien rookte zalm had in brasserie Braam en doe bin ‘k weer in de trein stapt. Hieronder nog een foto die ‘k vandemiddag in de mooie stad Harlingen maekt hebbe.