Vandaege he’k een dag vot west mit Saakje van De Harkema. We gongen jaors altied een dag naor Callaansoge, mar et was me now even te vule om zoe’n aende te rieden. Henne-en-weer van Ni’jhooltpae naor De Harkema en dan nog henne-en-weer van De Harkema naor Callaansoge. Dat is al rap een 340 kilemeter. En ja, ik wor wel oolder… Ik was vandemorgen om tien ure bi’j heur en om elf ure biwwe naor Zooltkaamp gaon. Daor hewwe eerst et Viskeri’jemuseum bekeken. Daor was een mooie tentoonstelling over viskersvrouwluden. Vervolgens hewwe eten op et terras van resteraant ZK86 an de haven. Nao Zooltkaamp biwwe even oostelik van Lauwersoge naor de Spaanse Trappen op ‘e zeediek west. Daor hewwe een tippe kuierd en we hebben naor alle wiendsurfers keken. D’r weren zeker wel een goeie twintig aktief. Een mooi gezicht! Misschien moe’k et es in me ommegaon laoten en begin daor ok nog es mit. D’r ston daor trouwens beheurlik wat wiend en et was d’r mar 21 graoden. Op ‘e Harkema he’k nog een bod sop en een kezebroggien had en doe bin ‘k weer op huus an gaon. Et wodde almar waarmer, hoe zudeliker a’k kwam, tot tussen de 28 en 29 graoden. Wat een verschil mit de kust! Hieronder nog een foto die ‘k vandemiddag maekt hebbe van de haven van Zooltkaamp.
