Zondeval

Vandaege zowwe oonze jaorlikse executeursbi’jienkomst had hebben. Ik hebbe et niet deurgaon laoten, want ik zol d’r niks an had hebben. Ik bin gauw mu, licht in et heufd en hebbe een hekel an drokke praoteri’je om me henne. Ik vien et hiel arg spietig, hadde et vreselike graeg aanders had. Ik leze wel beheurlik wat.

Ik hebbe de thriller Zondeval van Pascal Engman en Johannes Selaker lezen. Now he’k de drie boeken over pelisieman Tomas Wolf en journaliste Vera Berg dus allemaole lezen. Een schitterende serie, ik hope op meer boeken over Tomas en Vera. In Zondeval treurt Zweden vanwege de ramp mit de veerboot Estonia. Op ooldejaorsaovend 1995 wodt Tomas Wolf wakker maekt. In een bordeel is iene vermoord. Daor komt nog een gruwelike moord in een pornoklub aachteran. Tomas en Vera moe’n zien dat ze de moorden oplossen. Ze hebben in eerste instaansie gien idee  hoe as ze d’r mit an moeten. Zollen ze op een spoor kommen veurdat d’r nog meer meensken vermoord wodden? Dat is de vraoge!