Zoemervergeerdering JVS

Vandemiddag hewwe de zoemervergeerdering van de Johan Veenstra Stichting had. Aanders bin de vergeerderings altied bi’j mi’j thuus, mar vandaege wodde die hullen bi’j bestuurslid Jan Berend van Elp in Berkoop. We hebben genoeglik vergeerderd en alle projekten bepraot daor we op et ogenblik mit doende binnen. Nao de vergeerdering hewwe een kuier maekt naor et mooie hoolten prieel in de Meulebos. Dat prieel is indertied deur de Stichting bestuverd. Jan Berend hadde daor veur draankies en happies zorgd. Hiel mooi en gezellig. We bin daor ok op petret kommen. Ik hebbe ok foto’s maekt en d’r hadde vanzels iene onder dit stokkien staon zuld, mar et lokt me op et ogenblik niet om foto’s van mien tillefoon naor mien mailadres te sturen. Wat een gedoe toch altied. Op een bericht komt te staon da’k me argens anmelden moet. Mar hoe en bi’j wie? Et is me weer es een raodsel. Et vuult zo staorigan da’k in een wereld leve die ‘k niet meer bevatten kan. Daor a’k gien grip meer op hebbe.