Zinnig

Ik bin vandaege en morgen nog altied een betien an ’t verjaordag vieren. Vandemorgen wa’k om koffietied henne bi’j de Stellingwarver Schrieversronte in Berkoop en daor he’k et passeniel trakteerd op een lekker stokkien gebak van de waarme bakker. Vandemiddag he’k zels an ’t bakken west: een overheerlike ontbijtkoeke mit hunning.

Chris Canter schrift al jaoren in elk nommer van et Drentse tiedschrift Zinnig een artikel over poëzie. Hi’j zet een gedicht centraol en schrift dan over dat gedicht en et wark van de betreffende dichter/schriever. Nog nooit kwam d’r in zien rebriek Nedersaksische meisters een Stellingwarver an bod. Mar in et laeste nommer was et raek. Chris schrift over mien wark naor anleiding van et gedicht Fietsen uut de bundel De overkaant van et waeter. Een mooi artikel. Ik bin d’r bliede mit en tevreden over! Longern naor vroggere iekpunten in zien leven is een centraol thema in Veenstra zien wark, schrift Chris. En zo is et. Op zien zeuventiende kwam hi’j mit gedichten van mi’j in anraeking in een boek over schrievers en schrieveri’je mit een baand mit zien dörp Neilusen. In dat boek staot een serie van drie gedichten van mi’j. De toren van De Lichtmis. Die drie gedichten bin in 1988 opneumen in mien dichtbundel mit dezelde naeme.

Et noorderlocht was een peer aovens leden ok in de Stellingwarven te zien en ik hebbe vanzels vergeten om te kieken. Zoks is een prachtig gezicht. Et aldermooiste was et liekewel boven Gruunlaand te zien. Zie hieronder.