Zingende iesberen

Ondaanks et feit da’k al een weke dikke verkolen bin, biwwe d’r vandaege toch nog op uut west. We hebben eerst inkopen daon bi’j Modehuus Rinsma op ‘e Gediek en bin daornao naor Tuundorama in Drachten-Zuud west. Daor was alles al in kastsfeer en hewwe nog vule meer inkopen daon. Ik wodde herkend deur een vrouw uut Hooltpae daor a’k tiedens de sutelaktie an de deure west was. En vier mi’j onbekende meensken uut Drachten vertelden me dat ze me nog altied misten op ‘e radio mit mien stiekelstokkies. Dat is trouwens al haost dattig jaor leden! We hebben in et resteraant wat dronken en heerlik waarm appelgebak had. Bi’j de cavia’s weren vervelende kleinjongen doende die die dierties opjachten, et husien van heur ofpakten en ze zo an ’t schrikken maekten. D’r ston een nog jonge vader bi’j te kieken die d’r niks van zee. Die kerel hadde vanzels zeggen moeten dat ze daor drekt mit opholen mossen, dat ze die besies mit rust laoten mossen. En as ze niet luusterd hadden, hadden die kleinjongen een beste fleer over de fikken hebben moeten. Mar ja, de mederne tied… Praot me d’r bi’jtieden niet van! Ik bin vanzels een oolderwetse, konservetieve man… We hebben vanaovend heerlik eten bi’j Pieter Poot op ‘e Blesse. Een man zee daor tegen me dat zien vrouw him mien kollum van vandaege veurlezen hadde. Via de mail kwammen d’r ok een peer aorige reakties over die kollum en et leed van de waeter spi’jende en goelende wolven in Wolvege. Hieronder een foto die ‘k vandemiddag maekt hebbe van een kwartet zingende iesberen bi’j Tuundorama. Een klein maegien ston d’r mit grote ogen naor te kieken en te luusteren.