Ik hebbe et zesde diel van de Millennium-reeks lezen. De eerste drie boeken uut de serie wodden schreven deur Stieg Larsson en de laeste drieje deur David Lagercrantz. Et is de bedoeling dat een aandere schriever de volgende drie dielen schrieven zal. De boeken, die veur een pat ok verfilmd binnen, bin geweldig mooi en spannend. Ze gaon over journalist Mikael Blomkvist en Lisbeth Salander die allemachtig vule van komputers ofwet. In dit boek wodt op een morgen een onbehuusde man dood in een park in Stockholm vunnen. Mikael Blomkvist wodt deur de liekschouwer Frederika Nyman beld omdat de man een briefien mit zien tillefoonnommer in de buse hadde. Wet Mikael lichtkaans wie de onbekende, dooie man is? Lisbeth Salander is op dat ogenblik in een hotelkaemer an et Manegeplein in Moskou. Ze wil veur iens en altied ofrekenen mit heur zuster Camilla. Zol dat lokken? Een schitterend boek!