Ziekenhuus

Vandemorgen bin ‘k naor et ziekenhuus in Et Vene west te bloedprikken en ik bin in de kunde kommen mit mien ni’je internist. Een aorige jonge vrouw. Zi’j praotte Fries tegen mi’j, ikke Stellingwarfs tegen heur. De veurige is mit pensioen gaon. Dit is mien dadde internist, deur de daarmziekte kom ik al haost 40 jaor in et ziekenhuus. Ik hoeve trouwens niet elk jaor meer een onderzuuk te hebben, dat wodt now ien keer in de twie jaor. Mar wel elk jaor bloedprikken en een gesprek mit de dokter. Doe ‘k et ziekenhuus uutkwam, was d’r een demestraosie van de SP bi’j de heufdingang. Gister wodde bekend dat de ziekenhuzen van Et Vene en Sneek op termien opheven wodden en dat d’r een ni’j groot ziekenhus op ‘e Jouwer komt. Zo te zien was et volk et daor niet mit iens. Praktisch iederiene die uut et ziekenhuus kwam, zette zien of heur haandtekening tegen dit plan. Dat heb ik ok daon. Mar veurdat d’r op ‘e Jouwer een ziekenhuus staot, bin ik vermoedelik al dood.
Hieronder een foto die ‘k de veurige zundag maekte bi’j de Scheenesluus. De brummels hebben nog nooit zo uutbundig bluuid. Mar dat wil niet zeggen dat d’r ok een protte brummels kommen. Dat is mar krek wat veur weer as et de kommende tied wodt. Alles kan wel verdreugen.