Ziekenhuus

Omdat ze om zes ure vanaovend onweer verwaachtten bin ‘k vandemiddag mit de auto naor Eupen Stal west. Dat hadde aachterof bekeken niet hoefd, onweer hewwe nog niet had, mar et regent now wel goed. Et was vandemiddag weer beheurlik brodsig. Et was ietsien rustiger as gister in Berkoop. Een vrouw vreug a’k nog verhaelties op ‘e radio vertelde. Ze miende dat ze me nog wel es heurde tussen de middag. Mien hemel nog an toe, et is in september dattig jaor leden da’k daor mit stopte. Om zes ure he’k de boel daor op slot daon en ik bin, naoda’k even thuus west bin, votdaolik naor et ziekenhuus in Et Vene gaon. Daor he’k bi’j Jacob keken. We zitten op een leeftied dat d’r zomar wat gebeuren kan en daj’ in et ziekenhuus terechtekommen. We hebben genoeglik een klein ure praot en as et zo gaot, mag hi’j vermoedelik halverwege de weke weer naor huus toe. En dan eerst wel wat rustigan. Hieronder een foto die ‘k vandaege van et Business Centre Bercoop maekt hebbe. In dit gebouw zit de Stellingwarver Schrieversronte now en hier verkoop ik dus middags boeken en ik signere die van mezels ok as meensken dat willen.