Ziekenhuus

Gistermiddag begon ik boekzeerte en last van de daarms te kriegen. Ik hebbe vannaacht haost niet slaopen en bin vandemorgen uut veurzorg toch mar naor de dokter gaon. Want ja, ik hebbe een chronische daarmziekte en een vernauwing in de dunne daarm. De huusdokter docht en hoopte dat et lichtkaans wel mit een sisser oflopen zol, mar stuurde me toch naor de Spoedeisende Hulpe van et ziekenhuus. Daor he’k een peer uren op bedde legen, ze prikten d’r alvast een infuusnaalde in, en nammen bloed of. Et is dus niet goed, mar ik moch mit extra medesienen nog wel weer naor huus. Morgenvroeg moe’k weer naor de Spoedeisende Hulpe om bloed prikken te laoten. Et kan dus mar zo da’k ien disser daegen asnog opneumen wodden moet. As d’r inienend gien dagboekstokkies meer kommen, lig ik dus veur de zoveulste keer in et ziekenhuus.