Zestig jaor laeter

Op 10 meert 1966 trouwden Beatrix en Claus. Ik wete nog goed dat et die dag zwaorbewolkt was en d’r ston een flink stok wiend. Provo’s en relschoppers maekten d’r in Amsterdam een bende van. D’r ontplofte een rookbom tiedens de rit mit de Goolden Koetse. Her en der was Claus Raus kalkt. Preens Claus bleek laeter trouwens een biezunder verstaandige en sympathieke man te wezen. Meensken kun ok te vlogge mar wat raozen. Nederlaand hadde in die daegen 12,4 miljoen inwoners. Ik was 20 jaor en mos 20 daegen laeter, op 30 meert, onder dienst. Hoe ha’k doe daenken kund da’k 60 jaor laeter 30 boeken schreven hebben zol en meer as 3.300 keer de diek uut west hebben zol te vertellen. Ik gao aanst de weg weer uut. Ik mag vanaovend verhaelen vertellen in De Ferbining in Opeinde veur de plattelaansvrouwluden van de CPB. Ik bin daor op 15 november 1994 ok west te vertellen. Dat is ok al lange leden. Opeinde of Opaende leit tussen Drachten en de dorpen Ni’jege en Ooldege. Mit opzet schrief ik now een o mit twie punties d’r op om te zien as dat now ok weer veraandert in een vraogteken. Webmaster Pieter het de drie vraogtekens is een veurig dagboekstokkien verbeterd en wol graeg da’k et nog es perbeerde. Ik daenke dat et weer een vraogteken wodden zal…

Hieronder een foto die ‘k gister maekt hebbe. De eerste twie ammarillen bluuien volop. Et is een prachtig gezicht!