Johan Veenstra
Stellingwarver schriever en verteller

Zes kestelen

Plaetst op 2 juni 2023.

Bi’j et dagboekstokkien van gister ston een foto van kesteel Nijenhuis van de grafelike femilie Schimmelpenninck. Daor komt Sander Schimmelpenninck dus weg. Him kennen we as eerdere prissentater van et tillevisiepergramme Op1. Ik zie him neffens mi’j ok wel es in een reklamefilmpien over geld en hi’j wodt binnenkot veur de eerste keer vader. Dan het dat kiend hier wel de ruumte om te speulen as et bi’j zien grootoolden is. Schieve tegenover et kesteel he’k in een stallegien an de weg een pottien abrikozesjem kocht. Et volgende kesteel op oonze fietstocht was Weldam. Wat een schitterend gebouw! Hier woont de grafelike femilie Zu Solms-Sonnenwalde. We hebben daor een kuier deur de mooie tuun maekt en et intreegeld an de tuunman geven. Op et kesteel wi’jde een blauw-gele vlagge. Dat hadde niks mit OekraIne te maeken, et bin de kleuren van de grafelike femilie. De bloemen in de potten hadden dezelde kleuren. Ik zee dat tegen de tuunman. Hi’j vun da’k dat goed zien hadde. Zoks vaalt praktisch gieniene op, mar mi’j dus drekt wel. Veur an de weg, onder een boom op et terrein van et kesteel, he’k de lange broek verwisseld veur de kotte broek. We hebben onderwegens ok de prachtige waetermeule Den Haller bekeken. Alles staot daor in et Twents angeven. Mit drie Twents praotende manluden he’k daor een schoffien in et Stellingwarfs praot. En netuurlik he’k d’r wat kocht: mael om karremelkeek te maeken en een pond griesmaeltarwe om lekkere pudding te maeken. Veur et kesteel Huis te Diepenheim daor baron De Vos van Steenwijk en zien femilie woont, he’k de kotte broek weer verwisseld veur de lange broek. Ik hope oprecht da’k deur disse verkleedperti’jen gien gravinnen en baronessen overstuur maekt hebbe. Dat gelt vanzels ok veur graven en baronnen. Hieronder een foto van kesteel Weldam mit de blauw-gele femilievlagge.Op et kesteel Warmelo, waor de moeder van preens Bernhard woond het, wapperde ok zoe’n vlagge. Zol dat wel mit OekraIne te maeken hebben? Et liekt me stark dat de femilie Avenarius die daor woont dezelde femiliekleuren het as de femilie Zu Solms-Sonnenwalde.Wie et wet mag et zeggen.