Johan Veenstra
Stellingwarver schriever en verteller

Zelenski

Plaetst op 31 meert 2022.

Netuurlik he’k vandemorgen naor Volodimir Zelenski keken die de Twiede Kaemer toesprak. Dat was historische tillevisie. Zelenski is de juuste man op et juuste ogenblik veur zien laand. Ik hebbe groot respekt veur him. Al die toespraoken veur nationaole parlementen, daor hoolt hi’j de andacht veur zien laand mit vaaste. Hi’j hoolt oons ok een spiegel veur. Et komt him ongetwiefeld van passe dat hi’j akteur west het. Hi’j kan een tekst goed brengen, kan mit de media ommegaon. Hi’j het grif ok een goeie koppel meensken om him henne. Dat kan niet aanders. Zelenski was trouwens niet de eerste akteur die politikus wodde. Ronald Reagan en Arnold Schwarzenegger gongen him veur. Hi’j wus vandemorgen meer van oonze geschiedenis as een protte Nederlaanders. Mar et is morgen inderdaod een belangrieke dag. We leerden vroeger op schoele: Op 1 april verloor Alva zijn bril. Op 1 april 1572 ontzetten de Waetergeuzen Den Briel. Dat is morgen 450 jaor leden. Zelenski hadde et d’r over. Doe vochten wi’j hier tegen de keuning van Hispanje en wollen we de tyranie verdrijven. Zelenski en zien volk willen dat in disse tied ok. Zi’j vechten tegen die gore gofferd in et Kremlin. Ik zegge et Zelenski nao: Leve Oekra├»ne! Geef de man de waopens die hi’j neudig het!

En now… is et wit over et laand. D’r ligt sni’j! Ik vien sni’j altied mooi. Et was vandemiddag ok een prachtig gezicht, mar ik wil et niet om disse tied van et jaor. Vleden weke konnen we wel in de kotte broek fietsen en now… Harrekrastes nog an toe! Piet Paulusma is nog niet weg of alles is in ’t wilde… Mar ja, wat zeden we vroeger ok al weer? Maart roert zijn staart en Aprilletje zoet geeft nog wel eens een witte hoed! We zullen et d’r mit doen moeten.