Zegenriek wark

Vandemorgen he’k op et karkhof an ’t wark west: ontuug weghaelen bi’j zeuven femiliegreven/grafstienen. Ik hebbe al in gien tieden een rekentien had van de man die alles ieder jaor schonemaekt. Dat zal dus wel niet meer gebeuren. Ik zal binnenkot es bellen, want ik wil de boel ok wat opknappen laoten. D’r moe’n wat letters zwat maekt wodden, wat grune anslag moet weghaeld wodden en ik wil bi’j twie greven ni’je stienties hebben. Goed twintig jaor leden he’k alles ok opknappen laoten. Lao’k et now nog mar een keer doen laoten. Ik kan de boel now zels nog regelen. Laeter moet et bestuur van mien stichting d’r zorg veur dregen. D’r was preek doe ‘k an ’t wark was. De domenee hadde ommeraek vlocht op ‘e kooi. D’r stonnen wel 25 auto’s en 20 fietsen. Dat ik hebbe warkt tiedens klokkeluderi’je, orgelmeziek, et zingen van psalms en gezangen en de preek van de domenee. Misschien was et een zaachtmoedige preek, lichtkaans was de domenee foel en het hi’j of zi’j d’r overfleerd. Dat meensken dom en kotzichtig binnen en dat ze de schepping an ’t verrinneweren binnen deur heur gedrag. Ik hope dat de domenee d’r overfleerd het! Ik hebbe zodoende in ieder geval zegenriek wark verricht.

Veurdat et vandemiddag begon te regenen he’k nog 20 kilemeter fietst. Ik bin naor Wolvege west en bin mit twie fietstassen vol bosschoppen over De Hoeve weer op huus an gaon. D’r ston minder wiend as de laeste daegen en et was 20 graoden. Heerlik fietsweer!