Zeezicht

Vroeger sutelden we in de eerste weke van oktober as de kestanjes van de bomen vullen. Ik hadde dan altied een kestanje in de buse. Dat was goed tegen de rimmetiek, zeden ze. Gister vullen de kestanjes in Nunspeet al van de bomen. Ik hebbe drekt iene oppakt en in de buse stopt. Ie weten mar nooit waor et goed veur is!

Vandaege he’k een kollum in klad schreven die ‘k nog wel es uutwarken zal. Ik hebbe et verhael Parredies da’k inlezen zal bi’j de CBB ok nog es rippeteerd. Ik hadde now zes versprekings in een half ure. Dat is wel goed. Ik zal et ankem weke nog twie keer rippeteren. Meer het dan aenlik ok gien zin.

Ik leze now de drie Nederlaanse thrillers die ‘k kregen hebbe. Et boek Uitglijder van Loes den Hollander vul me tegen. Ik hebbe now Zeezicht van Linda van Rijn lezen. Dat is beter, mar nog niet zoas ik ze graeg leze. De Skandinavische thrillers daor ik zo gek op bin gaon aenlik altied over een pelisieman mit een hulpe (ok een pelisie of een journalist of zo) die een moord of meerdere moorden oplossen moeten. Et verhael in Zeezicht gaot over Jan en Anouk. Die bin trouwd en hebben twie kiender. Jan is de baos van meerdere meubelzaeken. De zaeken gaon niet best en daor wodt Jan zien zin niet beter van. Hi’j zit dikke in de stress. Dat het zien weerslag op et huwelik. Hi’j snauwt Anouk of en is vaeke niet te genieten. Ze kun ok gien vekaansie in Spanje meer betaelen, mar gaon een peer weken naor Bergen an Zee. Jan wodt veertig en Anouk verrast him daor mit een verrassingsfesien. In medern Stellingwarfs: surpriseparty. Dat hadde ze beter mar niet doen kund. Et fesien wodt hullen in de straandtente van Freek. Freek deugt niet, mar hi’j is stoer, het een tattoo, en is woest antrekkelik. Hi’j struupt Anouk mit de ogen de kleren al van et lief. Hi’j wil en zal heur hebben. En Anouk… Mien vrouwelike dagboeklezers snappen et wel. Anouk krigt weer andacht van een man en vuult heur weer vrouw. Zo gaot zoks. En die Freek mag dan wel niet deugen, ze wil gewoon wilde seks mit die kerel. Ik kan daor hielemaole in mitgaon. Mar ja, dan raekt Jan te zuke en wodt laeter in et waeter vunnen. Ze hebben him de hassens insleugen. Wie zol dat daon hebben?