Johan Veenstra
Stellingwarver schriever en verteller

Zeelaand

Plaetst op 22 jannewaori 2023.

Ik bin op deensdag 31 jannewaori weer an bod veur een kollum in de kraante en dat stokkien he’k vandaege schreven. Van deensdag 31 jannewaori op woensdag 1 feberwaori is et dan percies 70 jaor leden dat et waeter kwam. Daor gaot die kollum over, want ik wete dat nog wel. Ik zal trouwens et eerste weekaende van feberwaori naor schoonzuster Roelien in Zeelaand. Vlak veurdat de coronapandemie over oons kwam, hewwe in Goes heur 70ste verjaordag nog vierd en nao die tied bin ‘k d’r nooit weer west. We hebben mekeer tiedens corona allienig een keer zien bi’j Deli en Elroy in Arnhem. Mar now zal et dan eindelik toch weer wezen.

Ik kreeg et verzuuk veur een zin of een stokkien uut een gedicht veur boven een rouwadverteensie. Ik hebbe vandaege mien archief deursnuuid. In et verleden is et meerdere keren gebeurd dat meensken regels uut gedichten van mi’j bruukt hebben boven zokke adverteensies. Die he’k opzocht en toemaild. Plus nog wat aandere regels boven adverteensies die ‘k indertied uutknipt hebbe. Netuurlik he’k ze ok attendeerd op et boekien Stillestaon en weer deurgaon van Grietje Bosma en Attie Nijboer mit gedichten over verlös en rouw. Daor is lichtkaans ok wel wat uut te haelen.