Zeelaand

Dit is een hiel vroeg dagboekstokkien. Nao de fietstocht en de boottocht van eregister en gister, stao ‘k now op ‘e sprong en gao een peer daegen vot. As ik aanst vot bin komt Anke, d’r wodt dus goed veur poes zorgd. Ik gao naor Karel en Annie in et Braobaanse dörp Zeelaand. Karel brocht hiel arg lange leden koffie rond in et Stafgebouw van et 103 Geneeskundig Bataljon op ‘e Generaol Spoorkezerne in Ermelo. Ik zat daor op kantoor. Zodoende… Et is de bedoeling dawwe daor vandemiddag in de buurt fietsen gaon. Ik komme in de loop van morgenaovend weer naor huus. As et allegeer lokt mit de wifi komt d’r lichtkaans nog wel een dagboekstokkien van daor. As dat niet lokt moe’n jim tot morgenaovend laete waachten.

Ik kreeg een kaorte van Jan en Klasien uut et mooie Limburg. Ze schreven dat ze daor mit 12.000 aandere meensken naor een konsert van André Rieu op et Vrijthof van Mestricht west weren en dat was fantastisch west. Dat neem ik drekt an, zoks liekt mi’j ok hiel mooi toe.