Zathe en Landen en Hooilanden

Vandemorgen he’k op ‘e fiets naor Fysiosport in Wolvege west. Et voldot me best. Ankem weke kan ‘k niet omda’k dan even een midweke van de polle bin. Dat betekent da’k d’r de weke daornao twie keer henne gao. Op maendagmiddag en vri’jdagmorgen. Vandemiddag bin ‘k nog een keer op ‘e fiets naor Wolvege west. Ik hebbe medesienen van de apteek haeld en bin naor de dokter west. D’r zit wat een rooie plakke op ien bien. As dat groter of arger wodt, moe’k daor ankem weke, tiedens de vekaansie, foto’s van maeken en die naor de dokter sturen. En zo is d’r altied wat.

Ik hebbe ok wat spul naor de Ooldhiedkaemer brocht. As mi’j onverwaachs wat overkommen zol, zol et spietig wezen as dit in de grieze kontener kommen zol. Et bin een staepeltien tenielboekies van de vroegere tenielverieninge Nooit volmaakt van Ni’jhooltpae, wat teksten van oolde lieden, een soldaoteboekien van oold-omke Klaas Veenstra die ‘k nooit kend hebbe en tal van oolde verkoopboekies. Twieje d’r van bin nog mit de haand schreven. Wat schreven de meensken doe mooi! Kiek hieronder mar es. Dit is de eerste bladziede van zoe’n boekien uut et jaor 1884.