Yeeha! in Harlingen

Vandemiddag wa’k in Havenbrouweri’je Het Brouwdok an de Ni’je Willemskade in Harlingen. Daor wodde et boek Yeeha! prissenteerd. Een bundel mit 28 verhaelen van 28 schrievers in verschillende taelen: Aasters, Bildts, Franekers, Fries, Snekers en Stellingwarfs. Ik zat an een taofeltien bi’j Henk van der Veer. Henk en ik liggen mekeer wel: twie niet klein te kriegen vertegenwoordigers van nog wat kleindere taelen as et Fries. Van mi’j staot et verhael Karnemelkziepe in et boek. Hille Faber van uutgeveri’je DeRyp eupende de middag en doe kreeg Martsje de Jong et woord. Martsje het et boek saemensteld en daor een protte wark an had. Hulde! Koos Tiemersma las zien verhael Yeeha! veur en Gabrielle Terpstra heur verhael Drip. Wiebe van Dyk fleurde de boel op mit zien zingeri’je. In et Harlingers zong hi’j over zien stad an ’t Wad. Hi’j kreeg van Martsje ok et eerste exemplaor van et boek. Een al wat ooldere man mit een grieze baord en nog een stemme as een kenon. Op zien shirtien ston Ouwe Seun. Harlingers kan et niet. Et zat daor trouwens mooi in de boverzael mit een schitterend gezicht over et waeter. Nao ofloop weren d’r happies en draankies. Veural de happies bin vanzels belangriek. Ik bin now ienkeer gek op bitterballen en hiempies wost en keze. Hieronder twie foto’s. Boven: Henk van der Veer maekte disse foto en stuurde me die toe.Wiebe van Dyk krigt hier et eerste exemplaor van Martsje de Jong. Onder: et omslag van et boek. Een mooi boek om mit te nemen op vekaansie!