Wynroas

Vandemorgen he’k de administraosie daon angaonde de verkopen op ‘e vier laeste marken waor a’k mit boeken staon hebbe: Rottum, Mildam-Hooltwoolde, Blesdieke en Scharpenzeel.

Ik hebbe et boek Wynroas van Meindert Talma lezen. Dat was et Friese kedoboek van 2024. Op ‘e aachterflappe staot dat et een autobiografische tragikomische novelle is mit een dramatische ofloop. En dat is et ok, ik hebbe et trouwens mit een protte genoegen lezen. Et is verschrikkelik hoe as meensken je hinderen en lastigvalen kunnen. Gerrit Huidekoper jr. was de grootste en koppigste vi’jaand van schriever en meziekman Meindert Talma. Talma hadde de stemme van Huidekoper zien vader bruukt bi’j et maeken van een cd. Mit toestemming van een betreffende producent. Mar niet mit de specifieke toestemming van de zeune dus. En zo wodde Talma bestookt mit mails, brieven en rechtszaeken. En reken d’r mar op dat advekaoten duur binnen. As iene je bestookt mit berichten woj’ daor op et laeste staepelgek van. Zoks hiet stalken en ik kan et weten. Hier boven op ‘e zoolder staot een grote poede vol mailties en brieven. Op die meniere het iene me tien jaor laank lastigvalen. Op et laeste belaande ik bi’j de dokter en een psycholoog. De herinnerings an die tied staon dus nog op ‘e zoolder. Mar ik kon op disse meniere goed anvulen wat Meindert Talma overkommen is.