Wu Zetian

Vandemorgen wa’k om negen ure al in Wolvege bi’j Marian veur fysio-massage. Van daor bin ‘k drekt deurreden naor Berkoop. Daor he’k op vesite bi’j Peter (Hiemstra) west. We hebben genoeglik bi’jpraot. Hi’j hadde krek een koeke bakt en die was zuver nog wat waarm. Hiel lekker! Butendat het hi’j me vraogd veur een kulturele aovend in Berkoop tiedens de keunstmannefestaosie Eupen Stal. Op weer een aander verzuuk om een gedicht te schrieven he ‘k vandemiddag definitief ja zegd. Zo hoolt een meenske wark.

Doe ‘k in Zeelaand was, kwam d’r een kaorte van Harry vanuut et Keramiek Museum Princessehof in Liwwadden. Hi’j hadde daor de tentoonstelling Wu Zetian – De enige vrouwelijke keizer van China bekeken en pochte daor zeuven zakvol van. Ik hebbe die tentoonstelling een schoft leden al bekeken en was d’r lieke enthousiast over. Een grote anraoder! Mar… al dat moois is nog mar tot 25 meie te bewonderen. Wees d’r dus bi’j as de kiepen bi’j ’t voer!