Johan Veenstra
Stellingwarver schriever en verteller

Woudsend

Plaetst op 16 jannewaori 2024.

Vandemorgen hawwe hier een beste sni’jbujje. Wat is dat toch een prachtig gezicht. As kiend vun ik dat al mooi, dan ston ik veur et keukenraem van et oolde huus en perbeerde ‘k ien vlokkien tot de grond an toe te volgen. En dat doe ‘k nog. Ik bin et kienderlike in me gelokkig nooit kwietraekt. Aanders zo’k vermoedelik ok gien schriever wezen kunnen.

Vandemiddag moch ik verhaelen vertellen veur de leden van KBO en PCOB in mfc De Driuwp├┤lle in Woudsend. Tien jaor leden was ik ok al es bi’j heur west te vertellen. Ik hadde vandemorgen nog rippeteerd. Mit et oolder wodden nemt dat ok meer tied. Dat is dan mar zo, ik mag gewoon nargens stoeken blieven. Niks mag misgaon. Dat gong et trouwens wel, nao twie verhaelen hul de mikrefoon d’r mit op. De batteri’je was leeg. Gelokkig zat ik niet midden in een verhael. Dit overkomt me vaeker en dat is lastig. Waoromme wodt zoks van teveuren now niet even konterleerd? Dat is toch niet zoe’n grote muuite? Et vertellen gong veerder prima. De veurzitster zee dat et vule mooier west was as dat ze van teveuren docht hadde dat et wodden zol. Et was wel even spannend as d’r wel meensken kommen zollen. Ooldere meensken en gladde wegen is gien gelokkige kombinaosie. Gewoonlik kwammen d’r daor 30 tot 40 meensken op een middag. Mar now verwaachtten ze niet vule. Et wodden d’r toch nog 28 en dat is best een mooi koppeltien. De laeste keer da’k in Woudsend was, was een peer jaor leden tiedens een zoemerse fietstocht. We bin doe in Sloten begonnen te fietsen, deur Gaasterlaand, naor Elahuzen en Woudsend. Doe hewwe an et waeter op een terras zeten te eten. Now lag d’r sni’j op dat terras. Hieronder een foto die ‘k vandemiddag maekt hebbe.