Wondermooie droom

Ik drome haost altied vreselike aekelik. Dan bin ‘k bliede da’k wakker bin en moe’k zuver wat bekommen. Mar vannaacht kwam d’r een wondermooie droom langes en doe ha’k graeg nog veerderdromen wild. Ik leup mit Haarm en Jacob vanof Liwwadden naor een plak an de zee. Een hiele toffel zoj’ zo zeggen, mar in een droom kan alles. We kwammen in de dunen terechte daor een koppeltien volk zat te waachten. D’r braande een kampvuur, we heurden et roezen van de zee en et geluud van een stormvoegel. We zaggen een joongien van een jaor of achte, dat van Joshua hiette, en d’r mit zien vader was. Haarm kende de vader wel. Ikke niet. Veur al die meensken vertelde ik over mien leven. Over mien moeder, een onbekende vader, de boottochten mit een kammeraod… Zo now en dan hul ik even op en dan speulde d’r een man op een vioele. Et vuur vlamde op en ik begon weer te vertellen. An et aende klapte et volk en de kleine Joshua leup naor me toe en pakte me bi’j de haand. Dat ontroerde me. En doe wa’k wakker en now za’k nooit weten hoe et veerder gaot mit de kleine Joshua en zien vader en wie dat percies binnen. D’r zal wel gien vervolgdroom aachteran kommen.

Vandemiddag was et weer drok op Eupen Stal in Berkoop. Ik trof een protte gezellig volk en hadde bi’jtieden een dreuge mond van et praoten. D’r kwammen ok meensken die de Eupen Stal niet deden, mar om een boek kwammen. Dat is mooi! Gister ha’k op zestig centen nao een verkooprekord. Doe lokte et dus krek niet, mar vandaege lokte et wel! Ik bin now krek naor oonze kleine mark in et dörp west en hebbe bloemen, sjem en gebak kocht. En… ik hebbe d’r een foto maekt.