Wintermark

Vandaege he’k de hiele dag deurbrocht op ‘e Wintermark in Mildam. Et was hiel spietig dat de man van Hof van Schoterlaand niet mitdoen wol. Ik hebbe daor jaoren hiel rejaol in de grote zael staon kund mit mien boeken. Now ston ik in de pasteri’je van de Tsjongertsjerke, even wiederop. Daor was et vule krapper, mar ik bin toch hiel bliede da’k daor terechte kon. D’r kwam aorig wat volk langes en ik hebbe ok weer verschillende exemplaoren van Et liek in de Lende verkocht. Dat is vanzels ok een mooi Sunderklaos- of kastkedogien. We hadden et best in de pasteri’je. Tussen de middag kree’k een boltien mit een peer waarme knakwossies d’r tussen. Ik zag vandemorgen in de Mildamster Poolder wat moois! Een koppeltien van wel tien hatten sprong even veur me over de weg henne. Wat een prachtige dieren! Hieronder een foto die ‘k vandaege maekt hebbe. Dit is Bonnie, mien buurvrouw van vandaege. Zi’j verkocht deur heur zels maekte kaststokkies. Ze hadde een protte vlocht op ‘e kooi! Ik hebbe d’r ok iene van kocht en die staot hier now al mooi op ‘e taofel in de kaemer. Bonnie praot ok Stellingwarfs, dat et was vandaege zo eigen as wat an de aandere kaant van de Kuunder!