Wintermark Rottum

Vandaege wa’k op ‘e Wintermark in Rottum. Ik hebbe daor tussen de middag heerlike snet en een brotien kroket had. Ik kreeg praot mit verschillende meensken. D’r was ok een staotelid van de BBB. Die hadde verneumen da’k wel es wat schreven hadde over de kultuurdippeteerde. Now ja, al twie keer en d’r komt ok nog een dadde keer. Dat ze kun heur daor mar klaormaeken in Liwwadden. D’r was ok een man die vertelde dat hi’j bi’j de gemiente West-Stellingwarf warkt hadde en dat hi’j daor bi’j mien laeste ni’jjaorskonference west was en him daor slim mit vermaekt hadde. Hi’j wus zo nog te vertellen waor a’k et over had hadde en et is zeker al twintig jaor leden. Ik hebbe dat in et verleden twie keer daon en nao de laeste keer, waor die man dus bi’j was, moch ik niet weerommekommen. Ik stak de wethoolders een betien satirisch de gek an. Tsja… Van burgemeester Remco Heite moch ik wel weerommekommen, mar van die drie wethoolders niet. Ik zal gien naemen numen mar iene van de drieje is laeter nog burgemeester van Vlielaand wodden. En doe die drieje al jaoren vot weren bin ik nog ereburger wodden. Zo kan alles toch nog goed beteren. Ik hebbe vandaege ok nog een fluttien boeken verkocht en ik hebbe lekkere dreuge wost kocht van Klaas de Boer. Hieronder een foto. Dit was vandemorgen vroeg in et dörpshuus van Rottum. Mien boeketaofel staot hier veuran.