Winterlocht

Eerst nog even over mien ammarillen en dan over Winterlocht. Ik kriege now in 9 van de 11 ammarillen knoppen en in 4 van de 9 zitten twie knoppen. Et is gewoon een hatstikke goed jaor!

Nao Bolsward, Liwwadden, Dokkum en Sloten komt Winterljocht veur de eerste keer in de Stellingwarven onder de Stellingwarver naeme Winterlocht. Een prachtige lochtroute veur jong en oold. Een unieke poëtische aovendkuier, maekt deur et keunstenersduo Kroft&Smids. Tiedens Winterlocht veraanderen monementen, gevels en stegies as et waore in filmdoeken mit projekties van inspirerende animaosies, poëzie, filesofische citaoten en grappige filmpies. Onderwegens kommen jim mien gedicht Krek as Kandinsky uut de bundel Longerlaand tegen. En dat allemaole in et jaor dat keunstmannefestaosie Eupen Stal 55 jaor bestaot. Winterlocht is te zien van donderdag 12 meert t/m zundag 22 meert 2026, daegeliks van 19.30 ure tot 22.00 ure. De route is aanderhalve kilemeter en vergees toegaankelik. Kom naor Berkoop! Et mooiste dörp van de Stellingwarven is dan nog mooier!