Winkelen

We weren eins van doel en gao vandaege een aende kuieren bi’j de Scheene. Mar ik heurde dat et van de Pieter Stoevezaandweg naor de Scheene toe iene vieze modderproeze is en we hadden d’r gien nocht an en raek tot de aankels an toe in de drabse. We hebben dus gien aende kuierd. Dat was lichtkaans ok wel goed, want ik hebbe wat meer last van de burn-out klachten. In plak van een aende lopen hewwe winkeld. Dat kan en mag weer van et Haagse gezag! We bin eerst naor Modehuus Blaauw in Jubbege west. Daor was zoas overal uutverkoop. Mar dat hiet in medern en geef Stellingwarfs vandaege-de-dag vanzels sale. We hebben d’r niks kocht. Een man in de winkel begon mit me te praoten over mien stiekelstokkies van vroeger op ‘e radio. Dat is al meer as vuventwintig jaor leden en de meensken hebben et d’r nog geregeld over! Doe biwwe naor de Welkoop in Jubbege west om voer veur de voegels en poes Marja. En vervolgens naor Modehuus Rinsma op ‘e Gediek. Daor he’k zes t-shirts kocht en ik hebbe d’r mitien mien kedobon inwisseld die ze me toestuurd hadden veur mien verjaordag. We kregen d’r ok een bakkien drinken. Dat mochten we daor wel opdrinken, mar we mossen d’r bi’j staon blieven. Zitten moch niet. Nao De Gediek biwwe naor de Praxis in Wolvege west om een rookmelder veur mi’j te kopen. Die dingen wo’n verplicht. Mien oolden doe ‘k vot. Dit is iene die tien jaor warkt, dat daor zit ik de rit wel mit uut. Gelokkig hadde ‘k een monteur bi’j me, dat die het et geval drekt in de hal bevestigd. Omdat dit hiele goeien binnen, zuwwe binnenkot nog drie van die dingen veur me anschaffen. In de loop van de middag hewwe naor de snackbar bi’j de Koepelbos in Berkoop west om kiepe-saté, een brotien kroket en een frikandel. Hopelik kuwwe gauw weer argens henne te eten! Zoe’n snackbar is een uutkomst in donkere tieden, mar et blift een behelp!