Wilde gaanzen

Vandemiddag he’k weer bi’jpraot mit Frits. Die reageerde en reageert geregeld op mien kollums in de Liwwadder Kraante. Sund al wat langere tied zien we mekeer in et echt, ien keer in de maond of zo, en praoten we bi’j. Dat gebeurt altied in Museum Belvédère in Oranjewoold. Vandemiddag hewwe daor een peer uren heerlik in de zunne op et terras zeten. Mit netuurlik wat drinken en veural ok gebak d’r bi’j. En doe biwwe elk weer een kaant opgaon.

Et is vandaege Dieredag. Ik doe daor niks an, want et is hier elke dag Dieredag. Poes wodt elke dag verschrikkelik verwend. Mar… et is vandaege ok percies 50 jaor leden dat mien eerste boek Wilde gaanzen verscheen. Wat is dat al lange leden. Hoe ha’k doe ok mar daenken kund dat d’r nog 29 boeken aachteran kommen zollen. Et eerste exemplaor he’k doe in et Perveensiehuus in Liwwadden anbeuden an Hedzer Rijpstra, de Kommesaores van de Keuninginne. Ik vuulde me daor as een katte in een vremd pakhuus en wus kwaolik wa’k zeggen mos. Ik hebbe daor een verhael over schreven dat in et oktobernommer van et Stellingwarver tiedschrift De Ovend komt. Hieronder een foto mit van links naor rechts: burgemeester Boelens van West-Stellingwarf, mien moeder, Kommesaores Hedzer Rijpstra en de doe nog oe zo jonge schriever.