Johan Veenstra
Stellingwarver schriever en verteller
Plaetst op 22 oktober 2026.
Gister docht ik iederkeer al da’k wat vergeten hadde. Mar wat… En doe et dagboekstokkien al op mien webstee ston scheut et me eerst in de zin. Ik hadde de wierook vergeten. De drie keunings nammen elk wat mit veur et Kiend in de kribbe. Om nog sekuurder te wezen: Balthasar nam wierook mit, Caspar nam mirre mit en Melchior nam goold mit.
Vandemorgen was de kraante d’r weer es een keer niet. Starker: d’r weren drie kraanten niet. Donderdags krieg ik de Liwwadder Kraante, de Stellingwarf en de Ni’je Ooststellingwarver. Mar de busse was leeg en de buren hadden de kraante weer wel. Wat een ellende toch iederkeer. Ik wil gewoon morgens eerst de kraante(n) lezen kunnen. Daor moej’ dan weer aachteran. Ze zullen de kraanten weer over de post sturen en ze zullen de besteller weer aachter de vodden. En hulp dat dan mar!
Ik hadde vandemiddag graeg op ‘e fiets naor Wolvege wild om de griepspuite, mar et regende iederkeer en d’r ston aorig wiend. Ik bin daoromme toch mar mit de auto gaon en hebbe mitien naor de biebeltheek en de supermark west. Die griepspuite krie’k grif al wel een kleine veertig jaor en ik hebbe nooit griep. Wel bin ‘k winters een peer keer dikke verkolen. In de coronatied ha’k dat ok niet. Doe bleej’ een aende bi’j meensken uut de buurt en dat is soms op meerdere menieren een stok gezonder.
Op verzuuk van Steven de Jong bin ik een peer keer vaeker bi’j veurstellings van de film Sultan van Bercoop in de Filmkarke van Hooltwoolde. Ik bin daor op ‘e premiere op donderdagaovend 12 november, op zundagmiddag 15 november as d’r tal van goeie vrunden van me kommen en veerder nog op donderdagaovend 19 november en op vri’jdagaovend 18 december. Lichtkaans da’k d’r zo nog wel es een keer henneflutte.