Wiek bi’j Duurstede

Wat wi’jt et de laeste daegen toch hadde. Vandaege ok weer en toch he’k nog een goeie 30 kilemeter fietst. Dat kon niet aanders. Ik was vandemorgen om even nao 9 ure al in Wolvege bi’j de fietseman. Mien fiets kreeg vandaege de eerste en vergese servicebeurt. Ik hebbe van heur een lienfiets kregen en doe bin ‘k naor fysiosport gaon. Staorigan wo’n de oefenings die ‘k doen moet zwaorder en intensiever. Iederiene kent mi’j daor vanzels, mar ik kenne al die meensken niet. Een man vreug me a’k him wel kende. Hi’j hadde een peer jaor leden een keer mit me praot. Ik wus et waorlik niet. Hi’j vertelde dat hi’j en de vrouw op een terras in Wiek bi’j Duurstede zatten en doe kwam ik daor mit een aandere man an fietsen en doe kowwe mit mekeer genoeglik Stellingwarfs praoten. Doe wus ik et vanzels wel weer. Ik hebbe et thuus nog even naokeken. Jelle en ik zatten in een husien in Ommeren en op 30 juni 2022 hewwe een fietstocht naor Wiek bi’j Duurstede maekt. Ik hadde doe aekelike medesienen van de dokter daor ik niet lekker van was. Mar die dag gong et wel goed, a’k et me allemaole goed herinnere. Daor troffen we dus op een terras die man en vrouw uut Wolvege. Zi’j weren op vekaansie in Doorn. Nao fysiosport bin ‘k op ‘e lienfiets naor huus gaon. Nao et waarme middageten wodde ‘k al beld dat de fiets klaor was en doe bin ‘k drekt weer naor Wolvege west om mien eigen fiets weer op te haelen. Ik hebbe ok mar een fietstasse vol bosschoppen mitneumen. Dan he’k wat in huus. Alhoewel ik tiedens de pinksterdaegen kwaolik thuus bin. Hieronder dan mar een foto die ‘k op 30 juni 2022 van de mooie karke in Wiek bi’j Duurstede maekt hebbe.