Weinterper Skar

Ik hebbe vandeweke naor twie hiele mooie tillevisieseries keken. Eerstens de vier dielen van OLVG – Ziekenhuis met een hart. Een prachtig filmde dokementaire van Coen Verbraak. Een serie over dokters, passeniel en pesjenten van en in et bekende stadsziekenhuus van Amsterdam veur en tiedens corona. Gisteraovend was de laeste oflevering en de dokters vertelden hiel eupenhattig over de fouten die ze wel es maekt hadden. Want ja, iederiene maekt fouten. Dokters ok.  Ok op NPO 2 was de serie Highclere Castle: Het échte leven in het decor van de Engelse serie. Dat gong over et kesteel van de achtste graaf van Carnarvon en zien vrouw. In heur kesteel wodde de beroemde serie Downton Abbey opneumen. D’r kommen flutten toeristen, ok mit deur die serie. Mar wat is et pochelen en hool zoe’n laandgoed in staand. Elke dag moet de huud d’r op. Veur et passeniel en veur de aodellike bewoners. Aorig om te weten is dat de vuufde graaf van Carnarvon tegere mit Howard Carter in 1923 et graf van de Iegyptische farao Toetanchamon ontdekte.

In et Weinterper Skar ligt al jaoren een poëzieroute. Deur een prachtig stok netuur kuj’ hier en daor gedichten op botties lezen. Daor is ok een gedicht van mi’j bi’j: Sletel parredies uut de bundel mit dezelde titel uut 1994. Ik kriege zo now en dan een mailtien van meensken die mien gedicht daor ontdekt en lezen hebben. En soms lao’n meensken heur mit mien gedicht op petret zetten. Onderstaonde foto wodde me vandaege deur Janneke toestuurd. Ik bin d’r zels schaandelik genoeg nog nooit west…