Weeromme uut Goes

Ik hebbe mooie daegen in Goes had. Mooi en gezellig. Ik was vri’jdagmiddag om kwat veur 3 te plak. Onderwegens he’k onder Gorkum een tied stille in de file staon. Ik hebbe eerst gezellig wat bi’jpraot mit Roelien en heur kammeraodske Zwanie uut Aalten die de hiele weke bi’j heur was. Laeter kwammen Fred en Jannie ok en doe hewwe aovens eten in De Brass. Echt hiel arg lekker. Et zat d’r hatstikke vol. Nao et eten hewwe thuus mit mekeer ok nog wat naopraot. Gistermiddag hewwe luncht op et terras van Jersey’s op ‘e Grote Mark. Alle terrassen zatten vol en een orkest speulde meziek. We kwammen Jannie daor ok weer tegen. Die was daor mit een kammeraodske. De wiend was daor gister best wel fris. Mar uut de wiend en in de zunne was et heerlik. Laeter op ‘e middag hewwe een kuier maekt deur et park tegenover Roelien heur huus. Tegen 12 ure vandemiddag hewwe Zwanie in mien auto naor de trein brocht. Die is doe weer naor Aalten gaon. Roelien en ik hebben nog een kuier maekt deur et park. Om kwat veur 3 bin ‘k daor weer in de auto stapt en nao nog gien 20 kilemeter zat ik alweer in een file. Mar laeter gong et prima. Ik was om kwat over 6 weer in Ni’jhooltpae. Poes kwam me bi’j de deure mauwende integen. Die was slimme bliede, mar ik heurde in zien mauwen wel dat hi’j et toch niet aorig vunnen hadde da’k him zomar een peer daegen allienig laoten hadde. Al hadde Anke dan ok best op him past. Dat ik hebbe alle zeerte ofkocht mit lekkere snupies van Whiskas. Hieronder twie foto’s. Boven: Roelien en Zwanie op et terras op ‘e Grote Mark. Onder: we hebben ok een kleine stadskuier maekt. Dit is de haven van Goes mit schitterend mooie huzen, die ongetwiefeld beheurlik an de pries binnen.