Weeromme naor Texel

Et was tiedens Eupen Stal 2018 in Berkoop. Ik ston mien ni’je roman Vroeger is veurgoed veurbi’j en aandere boeken te verkopen in de hal van et gebouw van de Schrieversronte doe d’r een man mit een zwatte hoed op de deure inkwam. Hi’j vreug as ik him nog wel kende en ik wus et zo niet. Et was Harry die as jonge an et aende van de zestiger jaoren een peer jaor bi’j de belastinginspektie in Et Vene warkt hadde. Zien vader warkte ok bi’j de belastingdienst en ikke ok. En doe zag ik et wel weer. Harry en zien kammeraod Frans kwammen van Texel en omdat Frans wark in Et Vene kregen hadde, hadden ze hier ok een huus kocht. In Noordwoolde op vekaansiepark Et Bosmeer. En zo kwammen we nao al die tientallen jaoren opni’j in de kunde en wodden we goeie vrunden. We kwammen zo now en dan bi’j mekeer over de heerd. We gonges ok wel es naor een resteraantien, ok wel mit heur kammeraod Jan van Texel d’r bi’j.  En Harry gong iederkeer mit me mit naor et ziekenhuus doe ik an staar hulpen wodden mos. Aj’ allienig binnen zoas ikke moej’ wat meensken om  je henne hebben die mit je naor et ziekenhuus willen. Wiels Frans an et wark was, gaf Harry him d’r ommeraek bi’j in Noordwoolde en wodde veurzitter van et Dorpsarchief Noordwoolde (DAN). Mar ja, now is Frans ok uut et wark en ik kreeg vleden weke een mooie kaorte van heur vanof Texel (zie boverste foto) mit de tiedinge dat ze vanof 1 september weer in heur huus in Den Burg wonen. Ik vien dat jammer… Netuurlik blift et kontakt, mar dat wodt wel aanders. Gistermiddag he’k nog even bi’j heur in Noordwoolde op vesite west. Ik weens heur vanzels alle goeds toe en alle gelok van de wereld op heur mooie eilaand. Op ‘e onderste foto is et 14 meie 1969. De leden van passenielsverieninge Belreka van de belastingdienst maeken een reisien naor Rotterdan. Hier gaon we an boord van de Oranjeplaat veur een boottocht deur de havens. De nog zo jonge Harry is de twiede van links. Hi’j staot tussen Jelle Visser van De Lemmer en mi’j in. Allemaole nog hiel arg jong. Ik was doe 23 jaor. En we weren netties in de kleren. Dat heurde zo. Net pakkien kleren an, strik veur. Now ja, Harry niet zo te zien. Mar doe oonze kollega Marten van De Jouwer op een dag zonder strik veur op et wark kwam, wodde hi’j sebiet deur de chef mit de bus weerommestuurd naor huus en hi’j moch pas weerommekommen as hi’j d’r netties en fesoenlik bi’jleup. Dat weren nog es tieden, Harry!