Weer thuus
Plaetst op 1 juli 2022.
Ik bin weer thuus nao een mooie midweke in de prachtige Betuwe. Woensdag was wel even een wat misse dag. Mien lief is niet echt gek op ‘e prednison, zoks geft bi’jwarkings. Dat ik hebbe vandeweke nog kontakt mit de huusdokter in Wolvege had. Mar… we hebben ok prachtige fietstochten maekt. Ik zal jim vandaege en de kommende daegen bi’jpraoten over oons reisien naor de Betuwe. O ja, poes Marja was ontzettend bliede da’k weer thuus was en ik was bliede om him weer een aai geven te kunnen.
Jelle en ik bin hier maendagmorgen om kwat over elf in de auto stapt veur een reize die lange duurde. Mar… et was wel de kotste route in kilemeters naor Ommeren. We reden eerst deur de Westhoeke van West-Stellingwarf, doe de poolder deur naor Emmeloord, vervolgens richting Kaampen en Elburg. En doe deur alderhaande kleine plakkies op ‘e Veluwe. Een schitterende route. We hebben middags luncht op et terras van resteraant Banka in Nunspeet. Van daor biwwe in de Gelderse Vallei terechtekommen. Van Veenendaal gong et naor Elst. Daor biwwe mit de veerboot de Neder-Rijn overgaon naor de Betuwe. En doe wawwe d’r ok al haost. In Lienden hewwe bosschoppen daon en doe was et nog mar krap drie kilemeter naor oons huus in Ommeren. We hadden een husien aachter een mit riet dekte boerderi’je. We hadden daor een mooi huus! Grote woonkaemer, twie slaopkaemers, een keuken, een badkaemer en een tuun mit een terras. Wat wil een meens nog meer! Oonze huurbaozen weren Rob en Sophie. Die woonden mit de kiender in die mooie boerderi’je. Behalven dat ze oons huus verhuren, hebben ze daor ok plak veur 28 caravans. Et was d’r beheurlik vol. Rob is ok nog een dag of wat in de weke piloot van Transavia en vligt meensken vanof Eindhoven naor heur vekaansieadressen. Aorige meensken! We hebben et daor goed had! Ik vertelle morgen veerder. Tiedens oonze fietstochten he’k foto’s maekt. Hier alvast een foto van een mooie meule mit een peer husies vlakbi’j de Neder-Rijn. Zoawwe hier stonnen, konnen we in de veerte de hoge karketoren van Rhenen an de overkaant van et waeter zien.
Jelle en ik bin hier maendagmorgen om kwat over elf in de auto stapt veur een reize die lange duurde. Mar… et was wel de kotste route in kilemeters naor Ommeren. We reden eerst deur de Westhoeke van West-Stellingwarf, doe de poolder deur naor Emmeloord, vervolgens richting Kaampen en Elburg. En doe deur alderhaande kleine plakkies op ‘e Veluwe. Een schitterende route. We hebben middags luncht op et terras van resteraant Banka in Nunspeet. Van daor biwwe in de Gelderse Vallei terechtekommen. Van Veenendaal gong et naor Elst. Daor biwwe mit de veerboot de Neder-Rijn overgaon naor de Betuwe. En doe wawwe d’r ok al haost. In Lienden hewwe bosschoppen daon en doe was et nog mar krap drie kilemeter naor oons huus in Ommeren. We hadden een husien aachter een mit riet dekte boerderi’je. We hadden daor een mooi huus! Grote woonkaemer, twie slaopkaemers, een keuken, een badkaemer en een tuun mit een terras. Wat wil een meens nog meer! Oonze huurbaozen weren Rob en Sophie. Die woonden mit de kiender in die mooie boerderi’je. Behalven dat ze oons huus verhuren, hebben ze daor ok plak veur 28 caravans. Et was d’r beheurlik vol. Rob is ok nog een dag of wat in de weke piloot van Transavia en vligt meensken vanof Eindhoven naor heur vekaansieadressen. Aorige meensken! We hebben et daor goed had! Ik vertelle morgen veerder. Tiedens oonze fietstochten he’k foto’s maekt. Hier alvast een foto van een mooie meule mit een peer husies vlakbi’j de Neder-Rijn. Zoawwe hier stonnen, konnen we in de veerte de hoge karketoren van Rhenen an de overkaant van et waeter zien.