Weer thuus uut Goes

Ik bin krek, nao vier uren rieden, weer thuus, en bekof. Gister gong de reize wel vlot. Ik hebbe onderweg even een brotien en wat drinken had. Ik was gister nog mar krek in Wolvege en doe heurde ‘k op ‘e autoradio al dat de Vlaketunnel gisteraovend dichtegaon zol veur een peer weken. Hoe zol ik dan weer thuuskommen moeten? Ik hebbe veur de wissighied vlak veur Goes nog even wat hiele dure bezine tankt an de snelweg. Dat zol vandaege a’k in een enorme file belanen zol misschien niet kunnen. In Goes was et zoemers waarm: 23 graoden. Ik hebbe drekt de trui uutdaon. De auto he’k bi’j Roelien op ‘e oprit zet en doe bin ‘k naor Hotel Katoen kuierd. Makkelik te vienen want et is vlakbi’j de Grote Mark. Ik kreeg kaemer 106. Ik bin doe drekt naor Roelien kuierd. Et was van daor mar goed vuuf menuten lopen. Ze was stomverbaosd mar ok bliede. Ik hebbe heur kaemer bekeken en we hebben daor in de tuun zeten. Gisteraovend he’k heur mitneumen naor mien hotel en daor hewwe eten. Heerlike scholfilet. Vervolgens he’k heur weerommebrocht en bin weer naor et hotel gaon. Daor he’k de Liwwadder Kraante lezen en ik hadde een boek bi’j me. Ik hebbe slecht slaopen. Et ontbijt was vandemorgen hatstikke goed. Vandaege was et daor nog mar 12 graoden… Even veur elf ure wa’k weer bi’j Roelien. Ik hebbe heur weer mit naor et hotel neumen om te lunchen. En doe he’k heur weer naor et huus Martha Flora brocht en bin ik om half twieje in de auto stapt. Ik hadde op ‘e kaorte keken en uutdokterd da’k over Kapelle en Kattendieke naor Yerseke rieden kon en daor dan op ‘e snelweg kommen kon. Mar de weg naor Yerseke was ofsleuten. Ik hebbe daor mien huusadres intoetst en mit een sliert aandere auto’s over alderhaande kleine laandweggies mit de hieltied file bin ‘k toch redelik gauw op ‘e sneldiek naor Bargen op Zoom kommen. En doe wodde et een drege tocht. Almar traoge rieden en filevorming tussen Oosterhoolt/Hujpoolder en Almere. Dat is een aende! Ik hebbe d’r vier uren over daon en bin now dus bekof. Morgen meer. Hieronder een foto die deur ien van de verzorgsters maekt is. Roelien en ik in de tuun van Martha Flora an de Goesse Westwal.