Weer thuus

Om de middag henne wa’k weer thuus vanuut et ziekenhuus. Daor ha’k gien hinder van de hitte, hier wel. Doe ‘k vri’jdagmorgen votgong laggen d’r al flutten waske, daor is nog wel wat bi’jkommen. Dat ik hebbe drekt een wassien daon, dat hangt now an de liende en is vanzels zomar dreuge. Et is een gelok dat Jarmo zien moeder ok nog ziekenhuuswaske veur me daon het. Geweldig! Aj’ alles onderspi’jen en ze mit klysma’s in je zitten, komt d’r wel smerig goed. Wat was et heerlik doe ‘k weer wat eten moch. Een bakkien vla is dan et lekkerste eten van de wereld. Poes was oe zo bliede da’k weer thuus was. Et mooie was, dat doe Jarmo hier in huus west het om wat schone kleren veur me op te haelen hi’j poes mitien ok op petret zet het. Dat hi’j appte me een foto uut mien eigen huus mit poes d’r op. Dat is toch mooi! Ik bin nog niet van alle gedoe of. In september moe’k verschillende keren weer naor et ziekenhuus en ze willen zien as d’r ok oppereerd wodden moet. Mar ik bin eerst thuus. Jarmo het me ophaeld uut et ziekenhuus in een huurente van www.huureendje.nl uut Wolvege. Mit een eupen dak biwwe naor Ni’jhooltpae reden. Doe we thuus weren het hi’j een foto van me maekt!