Weer thuus

D’r sprong vandemorgen een iekhoorntien bi’j oons in Lochem veur de raemen langes. En doe pakten wi’j, nao et broodeten, oonze tassen in. De vekaansie zat d’r op. Et gong vusen te vlogge veurbi’j. Om tien ure biwwe uut oons vekaansiehuus vertrokken en mit de auto naor Lievelde reden. Daor hewwe bi’j kezeboerderi’je Weenink wat mooie kedogies kocht. Vervolgens biwwe in Aalten op vesite west bi’j Jan en Diana. Daor wodden we mit gebak ontvongen! We hebben genoeglik praot en d’r tussen de middag eten. Soep en alderhaande lekkere broties… Heerlik. We hebben ok nog een kuier deur Aalten maekt. Om half drieje biwwe daor weer in de auto stapt. Jan is op ‘e fiets een aentien veur oons uut reden, want overal weren wegen ofsleuten. Hi’j het oons et goeie pad wezen! Onderwegens naor huus was et verschrikkelike drok op ‘e weg. Et was niet plezierig rieden. We hebben vanaovend bi’j Van der Valk in Wolvege ieder een bod waarm eten had en wat lekkers nao. Bi’j et taofeltien aachter oons zat een mi’j welbekende vrouw uut Ni’jhooltpae mit heur fietskammeraodske. Ze hadden mitdaon an de Wolvegester Fietsvierdaegse en weren strontdeurnat regend. En doe he’k Jelle naor Sneek brocht en bi’j Gerda ofleverd. Daor is hi’j weer in goeie hanen. Ik hebbe daor nog een koppien drinken had. In de stromende regen bin ‘k naor huus reden en daor was poes slimme bliede da’k d’r weer was. Et was vanzels ok gien doen om dat aarme dier zolange allienig te laoten. Mar Anke het goed veur him zorgd! Ik zal now nog wat uutpakken en dan geef ik me daele in een makkelike stoel! Hieronder een foto die deur Diana maekt is van Jan, Jelle en mi’j. We staon hier midden in Aalten bi’j de oolde Helenakarke.