Weer thuus

Ik bin weer thuus vanuut Goes. Et lokte niet mit et waachtwoord van de wifi. Dat wodde weigerd. Dat zodoende hadde ik daor gien internet. We bin nog in een tillefoonwinkel west en vraog hoe dat kon. Mar ja, ik dee alles wel goed… Techniek blift ondeurgrondelik veur oons. Et was vri’jdag een lange en drege reize naor Zeelaand. Ik raekte tussen Utrecht en Gorkum iederkeer in fileachtig gedoe. Dat ik hadde 3 uren en 50 menuten wark (zonder twie keer vuuf menuten schoft) neudig en kom bi’j Roelien in Goes. Ik was daor in feberwaori vleden jaor veur et laeste west. Et was daor niet et mooiste weer. Gien fotoweer, dat ik hebbe gien foto’s maekt. Vri’jdagmiddag biwwe Goes in gaon om te winkelen. Ik hebbe in boekwinkel De koperen tuin de twie laeste boeken van Anya Niewierra kocht: De camino en De nomade. We hebben ok wat dronken op et terras van De Landbouw an de Grote Mark. We zaggen daor een vader en een moeder mit een klein kiend dat op blote voeten op ‘e straote leup. En et was kil weer. Dat is toch hatstikke gek! Vervolgens hewwe ok nog een kuier deur et park tegenover Roelien heur huus maekt. Ik bin gien loper, dat ik vernam et wel an de rogge. Aovens biwwe Goes weer in west en doe hewwe lekker eten in datzelde resteraant De Landbouw. Ik hebbe de eerste naacht op een vremd bedde niet goed slaopen. Gister bin we Goes weer in west en doe he’k me een peer zoemerschoenen kocht. Op een terras hewwe wat dronken mit een heerlike hiempe appelgebak d’r bi’j. Middags biwwe naor et Veerse Meer reden en daor hewwe in resteraant  De Meerkoet wat dronken. D’r ston beheurlik wat wiend en et was triest weer, dat d’r weren niet zovule zeilboten te zien. Vervolgens kwammen Margreet (ex-kollega van Roelien) en René nog op vesite. Aovens hewwe eten in resteraant Het Postkantoor in et oolde postkantoor van Goes, ok al an de Grote Mark. Doe we weer thuus weren, hewwe beidend geneuten van de ofscheidsshow van Youp van ’t Hek. Vannaacht he’k wel goed slaopen! Vandemorgen hewwe nog een kuier deur et grote park maekt en doe he’k nog een bod waarm eten had bi’j Roelien en ja, doe weren die peer mooie daegen al weer veurbi’j. Om goed ien ure bin ‘k daor weer in de auto stapt en nao 3 uren en 15 menuten wa’k weer thuus. Et ree vule vlogger as vri’jdag, d’r weren now haost gien vrachtwaegens bi’j de diek. Wat ridt de ni’je auto goed en lekker! Poes was slimme bliede da’k weer thuus was. Ik hebbe him vanzels drekt wat lekkere snupies geven.