Weer optreden

Vandaege he’k vanzels even naor Preensiesdag op ‘e tillevisie keken. Et was mooi om te zien en ik mos daenken an et jaor 1981 doe ik alles in et echt zien hebbe mit mien moeder en Neeltien. Doe was Beatrix sund 1980 keuninginne, wodde peleis Noordaende nog opknapt en was Peleis Lange Veurhoolt nog ik gebruuk. Daor zit now et Escher Museum in. Doe ree de Goolden Koetse vanzels nog, die zuwwe grif nooit meer zien. Ik vien de Glaezen Koetse aenlik ok mooier en sierliker.

Et vertelseizoen begint vandaege weer. Ik zal vanaovend naor De Harkema om te vertellen veur de Froulju fan Doe en No. Ik bin in et verleden al meerdere keren bi’j heur west te vertellen. Ik vertelle vanaovend ok wel verhaelen die ‘k daor 25 jaor leden ok al es verteld hebbe. Ik gao d’r vanuut dat ze dat allemaole niet meer weten. Netuurlik gao ‘k ok vertellen uut en over mien laeste twie boeken: Et liek in de Lende en Naozoemerlaand. Ik haele Saakje eerst an, die gaot mit me mit. Ze is trouwens lid van die klub. Ik hope da’k goed rippeteerd hebbe en dat mien stemme et goed doen wil. Daor zit ik nog wel een betien over in. Et is vanaovend optreden nommer 3265.